(1921-2016-ж.ж.)

Кыргыз ССРинин Эл акыны Кыргыз Республикасынын Баатыры С. Эралиев 1921-жылы 15-октябрда Талас районунун Үч-Эмчек айлында туулган. Улуу Ата Мекендик согуш жылдарында (1942–1944-ж.ж.) согушка катышып, оор жарадар болгон. 1944–1951-ж.ж. Талас облустук «Лениндик туу» гезитинин жооптуу катчысы, «Кыргызстан пионери» гезитинин жооптуу редактору, 1959–1965-ж.ж. Кыргызстан Жазуучулар союзунун башкармалыгынын катчысы, 1965–1967-ж.ж. Москвадагы Жогорку адабияттык курстарда угуучу, 1967–1984-ж.ж. Жазуучулар союзунун башкармалыгынын адабий кеңешчиси, 1984-жылдан Кыргызстан Жазуучулар союзунун кыргыз акындарынын ассоциациясынын президенти кызматтарын аткарган. Ырлары 1939-жылдан жарыялана баштаган. Биринчи поэтикалык жыйнагы «Биринчи жаңырык» деген ат менен 1949-жылы жарык көргөн. С.Эралиев кыргыз поэзиясында биринчи болуп эркин ыр формасын 1966-жылы жазылган «Жылдыздарга саякат» поэмасында чеберчилик менен пайдаланган. Акын У. Уитмендин, Р. Тагордун, М. Турсун-Заденин, А. Твардовскийдин чыгармаларын кыргыз тилине которгон. С. Эралиевдин чыгармалары көп тилдерге которулуп, «Жылдыздарга саякат» поэмасы 1967-жылы Югославияда басылып чыккан. Ал «Элдердин достугу» ордени, Биринчи даражадагы «Ата-мекендик согуш» ордени, I жана III даражадагы «Манас» ордени, Украинанын «Ата мекенди коргоочу» медалы менен сыйланган. Кыргыз ССРинин Эл акыны наамын 1974-жылы алса, 2006-жылы Кыргыз Республикасынын Баатыры ардак наамына татып, "Ак Шумкар" өзгөчө белгисин тагынган. Т. Сатылганов атындагы мамлекеттик сыйлыктын лауреаты, СССРдин көркөм чыгармачылык жаатындагы А. Фадеев атындагы сыйлыгынын ээси болгон. 2000-жылы кыргыз жана казак элдеринин ортосундагы достукту чыңдоодогу зор салымы үчүн Казакстан Республикасынын «Алтын көпир» аттуу Эл аралык сыйлыгы берилген.